Skiednis

Skiednis fan de Stadige Strikers                   

Yn it jier 1979 is der yn Skearnegoutum in jeugdklup Frysk damjen oprjochte mei de namme “De Stadige Strikers”. Dy namme kaam ta stân om de bern der op te wizen dat se foaral stadich spylje moasten. Bern skowe as jo der neat fan sizze as wylden. Fandêr dizze pedagogyske namme.

Doe’t yn 1981 in oantal minsken it wol sitten seach om ek in klup foar grutten op te rjochtsjen is de selde namme as klupnamme keazen. En no bestiet dy namme dus al mear as tritich jier.

It gyng de klup yn dy begjinjierren foar de wyn. De jeugdôfdieling hie jierren oanien wol om de tritich dammers hinne. Dat wiene fansels lang net allegearre dammers. Inkele fan dy bern ha noait in spultsje wûn, mar der wiene ek oaren. In oantal hie it fuort al yn ’e smizen en oaren learden it stadichoan better. Yn elts gefal plukte de grutte klup de fruchten fan de lytse, want alle jierren kaam der wol in oantal bern by de grutten.

Dat gyng allegearre goed oant it momint dat der op de damdei skaakles oan bern  jûn waard yn Skearnegoutum. De skrandere mantsjes gyngen fanôf doe foaral te skaken. En it jout neat mei it skaken lizze der ek hiele oare mooglikheden foar de takomst. Om koart te gean: it skaken bloeide op en it jeugddamjen rekke wat yn de nederklits.

Op dit momint is der allinne noch de grutte klup. It ledetal skommelt de lêste jierren sa om en by de tweintich. Dizze leden kamen yn it begjin op tongersdeitejûn byinoar, mar nei  in oantal jierren is men ferhuze nei de moandeitejûn. Offisjeel begjint de jûn om kertier oer sânen. It is meastal sa’n kertier foar achten as elk sa’n bytsje de tsjinstanner fûn hat.

Krantestikjes.

Al jierrenlang wurdt der fan alle damjûnen in kranteferslachje makke foar de Snitser Krante. Dat binne Fryske stikjes en de bedoeling dêrfan is om op in as it kin snedige manier de damsaken buorkundich te meitsjen.

Klupkampioenskippen.

Alle jierren dogge de Strikers ek mei oan de klupkampioenskippen Frysk Spul. Yn 1982 begûnen se yn de alderleechste klasse en al gau siet it earste achttal yn de kampioensklasse. Dat achttal is in pear kear as twadde einige, mar in kampioenskip siet der noch nea yn al skilde it soms mar in heale boerdpunt. Oant it jier 2009. Doe waarden de Strikers einliks in kear klupkampioen en elts wie út ‘e skroeven! No al wer jierren efterelkoar binne de Strikers mei trije achttallen paraat, hoewol der sa hjir en dêr noch wol ris in dammer liend wurde moat.

Persoanlike kampioenskippen.

Guon Strikers dogge ek mei oan de persoanlike kampioenskippen. Yn dat ferbân belibbe de klup yn 2001 eat bysûnders, omdat harren lid Jelle Wiersma dat jier kampioen Frysk Spul waard. In dammer dy’t fuortkommen is út de jeugdklup, eigen kweek dus en dan de alderheechste wurde. Dat betsjutte ek foar de klup in boppeslach, wat er yn 2007 en 2008 werhelle.               

De skylpodde.   

It skaaimerk fan de Stadige Strikers is de skylpodde. Ien fan de bestjoersleden hat dizze podde tekene en alle stikken sa as útnoegingen, kwitânsjes en sa drage dit logo. It is de stadige podde dy’t prachtich by de Strikers past en boppedat hat de podde in sterk en taai skyld en dat jildt ek foar de Strikers, dy binne ek taai mar ek guodlik. Einliks te guodlik en dêrom slagge it harren oant no ta om noch mar ien kear kampioen te wurden.

It stryk ta toernoai.

It klinkt wat frjemd, mar it idee om stryk ta wedstriden te organisearjen komt út de koker fan damklup De Stadige Strikers. Der kamen op de sneonswedstriden hieltiten minder dammers, dêrom kaam it bestjoer mei de stryk ta wedstriden. Elke spiler krige de partij 40 minuten op de klok. Sadwaande koe men op ien jûn trije spullen spylje. En dat foel by in soad dammers tige yn de smaak. Ferneamd yn dit ferbân wie it Boelens Koppesnellers Toernoai. Alve jier lang hat dit bedriuw dit toernoai stipe. Hjirnei waarden wy stipe troch restaurant El Pacho út Snits en fanôf 2009 is Wiersma Acountantskantoor út Wommels ús sponser. It is in tradysje wurden om dizze stryk ta dammerij flak foar de Kryst te hâlden.

It bestjoer.

De Stadige Strikers ha in trijekoppich bestjoer. Hjir hawwe de folgjende persoanen in sit yn en sy jouwe jo graach ynljochtings: