Broeslezzen
|
|
Veurwoord
|
|
|
|
Schriefwedstrieden
Verschaaiden gemainten in onze provinsie organizeren joarlieks n schriefwedstried. De winnoars goan zulfs deur noar de provinsioale kampioenschappen ook wel de wereldkampioenschappen Grunnegs schrieven nuimd, omreden naargens aans wordt ter zo'n wedstried holden. De inzendens De jury let bie t beoordailen van de inzendens in eerste instantsie nait op de spellen. d'Inhold en d'opbaauw van de verhoalen en de gedichten stoan veurop. As ze wel op de spellensvoardeghaid van de dailnemers letten gingen, vuilen der votdoadelk al hail veul inzendens of. t Is din ook slim schaande dat t zo slecht steld is mit de spellensbekwoamhaid van de Grunnegers en ale aandere lu dij zok doar veur interesseren. n Broeskurzus t Schrieven in t Grunnegs is nait zo stoer as veul lu wel denken. As je n aantal dingen waiten, schrief je zo d'helfte minder fouten as veurtied. Dizze Broeskurzus is o.a. veur dij lu dij t Grunnegs nog nait zo goud onder de knij hebben, mor t aibels schier vinden om in d'aigen streektoal te schrieven. De opzet Der stoan 14 lezzen op t internet. As ie vroagen hebben over de spellen, kinnen ie dij noar mie tousturen. Ik perbaaier din zo gaauw meugelk te reageren. Buutendes kin der n.a.v. n vroag weer n les ontstoan, dij k din weer touvoug. Dizze kurzus wordt nou ombatterijd noar t ABG. Meer doarover kin je lezen op d'homepage van dizze site. Buutendes kin je de Grunneger diktees in t ABG volgen. De lezzen In elke les komt n spellensperbleem aan bod. Eerst is der n körte inlaaiden, din wat veurbeelden en doarnoa wat opgoaven. Ie kinnen dij din zulf moaken goan. Onderaan elke les zit n link noar de bladziede woar je joen "huuswaark" noakieken kinnen. Ie kinnen d'opgoaven kopiëren noar joen tekstverwaarker om ze te bewaarken en eventueel zulf aan te vullen en/of uut te braaiden. Vroagen en opmaarkens Hejje vroagen of hejje n perbleem dij nog nait in ain van de lezzen aan bod west is? Stuur din gerust n e-mail noar eltjedoddema@hetnet.nl Ik zal din perbaaiern om doar in de vörm van n broesles aandacht aan te besteden. reaksies noar: Biewaarkt: 27-03-10 18:24 uur |
